TIKKI DAK-DANAK Eps. MARTAON BARU

Tung do hape, ia dung saonari , molo ni rimangan akka partikkion naung salpu i gabe tubu di roha naeng mangalapati parsorion i.  Ima, partikki on di na martaon baru di masa dak-danak.  Sai adong hape akka na gabe si ingoton sian i, na tung mambahen roha naeng mulak tusi  dimasa saonari on.

Jam 6, rabbon rabbon dope, ai nunga ni tabbat hon horbo tu hauma.  Asa boi hatop lau martaonbaru. Nunga be attong ni sabi rupput ni horbo 5 goni asa boi tabbathonon horbo on jonok tobak ( kubangan), ai molo so ni paeret pe sadari i, dang pola boha, ai bosur do attong horbo i jala adong do soburanna.  Nang  akka dongan pe tong da attong songoni.  

Dungi muse marsijouan ma  hita akka na mardongan asa boi rap lao. Marduskusi ma muse, mulai sian jabu ni ise do mulai partaonbaru an on. Ai molo martaon baru attong na uju i, lao martamu tu jabu ni sude akka jolma na adong di luat ni iba on, hira- hira songoni ma attong. Jadi lapatanni on, hira hira,,,marsimaafan ( aha do tahe bahasa batak ni maaf.?) manang minta maaf sabbil marsijalangan dohot akka natua-natua nang sude jolma na di luat ni iba. Salamat taon baru tulang..amang boru..Oppung..Uda..bapa tua...sude ma akka na jolma na juppang ni jalangan...sabbil mandokkon salamat taon baru  on. 

Dungi muse, nunga be attong lao hita tu bagas ni parbagas. Nung sae marsijalangan, hundul be  ma attong hita on. Parjabu on di patupa ma akka Kue taon baru, nang akka si inumon ( hira hira on ma attong indahan na las dohot aek sitio tio na) songoni do attong biasana. Jadi ala, cerita on tentang dak-danak do, fokus ma attong tu perrohaon ni ba tikki dak-danak.

Ai molo nunga di patupa parjabu akka na na tupa di tikki na martaon baru on, memang attong anggo roha ni iba on tor holan tu Kue taon baru on do attong. Aha do ibaen kue taon baru na, aha do ibaen si unimon na?. Nata pe, roha i sai songoni..ai anggo ragam ni kue taon baru on sian bagas na sada on, sai tong do nian sarupa sude dohot bagas na asing an. Ai ima jo parroha on tikki i.

 Uju i, solma na, na tupa on attong, ima ; Kobbang loyang, Lappet, Sagu-sagu dohot roti bawang. Hira hira on ma somal na menu utama. Dungi muse, ai molo adong mulak pangarattona, bah adong ma tupa biasana kue  jakarta ( manang khong Guan, roti kaleng otteng dohot Dodol).  

Na uju i attong.. ai anggo di roha niba, molo nung ni allang roti kaleng otteng tor nirippu nama inon sipanganon na paling marvitamin manang na untabo di portibion. Ai holan mamereng gambar kaleng nai pe attong ai nunga ro ijur..manang mandedei ijur niba mamereng gobbar ni kaleng ni kue i. Dang hinata tahe..na uju i, ai so hea ni allang kue. Ai holan sahali saminggu do attong onan, ipe sai tong do holan goreng pisang di tuhor inong niba, sahali-sahali di tuhor martabak on. Anggo tikki i, ai nunga tung tabo situtu inon ni allang.

Hape, molo rimangan tu saonari on, taringot akka sipanganon manang siallangon. Ai tung do hape lebih bergizi “Halosi na i tobbur tobbur ni inong niba  na uju i molo ni bandingkon tu akka roti kaleng dohot martabak otteng”. Nung sao nari pe, gabe masihol man iba naeng boi muse manggallang “ Halosi na i tobbur manang Ulu ni gulomo na i tuk tuk tu panituan.”

Taringot ma muse tu namartaon baru. Nunga be attong bot ari, bah akka partaon baru mulak be ma tu jabuna, ai ikkon pabarahon horbo dope attong.  Di tanggal 2, dang be martaon baru, kembali ma muse songon ari ari na biasa. Alai tong dope attong ni pakke baju taon baru on, jala muse sai adong dope kue taon baru di jabu. Jadi, terasa dope attong suasana taon baru i.  Di tanggal 3, nunga be habis kue taon baru, biasana holan sagu-sagu nama na adong dohot lappet. Molo di tikki taon baru i, dan ni allang sagu-sagu dohot lappet,hape molo nunga tanggal 3, nunga hurang be lappet on.

Di tanggal 4, dang be adong suasana  taon baru, marmahan na ma iba sadari manipak, paette masuk sikkola.

Ai molo saonari, nunga be tung maddodos ari ari ni bolusan,,,

WN

TIKKI DAK-DANAK Eps. MARNATAL

Dungi juppang ma tikki di ari pesta. Dang be holan maria ia be anggo pakkilalaan, nunga be tung gabe sappe martilhang-tilhang iba huhut marikkati husan-huson. Ai,    Nunga be attong di tuhor inong niba on baju mar-ayat ayat na ni tongosson i.  Bagak situtu ma attong baju niba on da ba., sai pehesek-hesekon ma attong iba. jala olo do attong marsisukkunan iba dohot dongan “nunga di tuhor baju tabbaru mu.?” Ningon ma attong, au nunga bah...celana ku na bongkar pasang i do, semangat ma attong iba mandokkon tu dongan on.  Dang dope juppang ari natal, ai anggo baju natal on nunga sai ni coba attong lobi sappulu hali. Dungi muse ni sussi ma attong sepatu sikkola dohot kaus kaki sikkola sa ias ni ias na. Molo na uju i merek ni sipatu ima “RIKER”,  ai ido attong pakke on mar-ayat ayat. Dang adong istilana  “sipatu taon baru”  holan “ baju taon baru” do adong.

Nunga be attong juppang borngin ni ari natal.mangarade ma attong lao tu gareja. Jam 5 sore nunga be ni pabara horbo, alana naeng  marhobas  iba. molo soi jolo si sabi majo rupput, asa adong allangon ni horbo on di bara.

Molo tikki ari natal, biasana musim udan do. Jadi, sai olo ma  ni bukkus sipatu niba pakke palastik, asa unang kotor sepatu on sahat tu gareja. Boha ma attong ikkon tampil saganteng ni ganteng do attong iba na marayat-ayat on. Ai olo attong sipata lomo roha niba mamereng akka borua dongan dak-danak on.  Jadi songon na ma ila do iba, molo so tampil ganteng.

Domu tu akka ruhut-ruhut ni par-ayat ayaton. Sai godang akka na so boi tarlupahon. Godang attong akka na lucu ni rasa. Jala sampe saonari masa dope i ra  ida on di akka dak-danak  si nueang.

Akka aha mai deba, ima; Tarlumobi tu akka na baru-baru dohot marayat-ayat, sai adong do attong akka na lucu, Nina ma attong “ di mula ni mula na .....Amen” tor inna attong, hape dang dope sude di dokkon ayat ayat na on. Ai anggo so i, adong ma deba attong holan maju tu jolo, alai dang olo mandokkon ayat-ayat na on. Sai loja guru sikko minggu manganju, tong dang olo mandok. Na olo i ma attong muse, holan naeng didok  imana ayat-ayat na on, tar langsung tangis. Dobo huroha imana lupa, molo istilah nuaeng  gabe ‘blank”.  Gabe dang jadi be..... hape anggo sian jabu attong, songoni ma semangat na.

Nunga be attong tarbolusan ari natal. Dungi juppang ma muse tikki na mardrama sikko minggu. Tung leleng attong marguru holan mempersiaphon drama on.

Manjou ma attong pakke mic sian gareja ai molo so godang dope penonton ro sappe jam 8 borgin. Nina ma attong “ ina nami ama nami, natua tua nami dohot akka dongan sikkola minggu, asa marneang ni lakka ma hita..... alana acara nunga naeng di mulai”. Ai jam 8 do attong rencana drama on di mulai. Hape na olo ima gabe jam 9.30 do annon asa di mulai. Ai leleng leleng attong asa ro penonton biasa na. Mardomu attong molo tikki ari natal, musim na do marsuan di galung jadi attar leleng leleng do mulak jolma sian hauma.

Nunga be attong di mulai drama on. Molo na uju i, mar babak demi babak attong drama. Molo sae sa babak, ba..adong ma attong selingan goarna manang hiburan. Jadi molo tikki selingan manubbang ma attong penonton. “boru ta bo..boru ta,, inna akka penonton on ma, sabbil mardalan tu pentas on manubbang”

Taringot tu selingan manang hiburan on, ala di subbang do attong, molo adong  selingan ni ba, biasana marnortor manang marende, olo do attong dang nu paulak subbangan on tu karanjang na i. Lak bulus ni pamasuk tu kantong. Terhila-hila la inna roha. Ai anggo so i, deba ni paulak, deba nai.lak ni solot hon tu kantung ni ba on. “””””Anggo iba nian dang olo songoni...dongan do na huceritahon on”””.

Jadi tikki namardrama on, dang sei sude attong pemeran drama on hafal akka drama na. Sai olo ma, di ajar ajari guru sikkola minggu on, akka pardrama on sian balik layar. Ai molo soi, dibaen ma pura-pura manjaha koran peranna, hape na lagi manjaha teks ni drama on do attong sabbil.  Na olo do attong muse sala mandokkon pardrama on... ala di ajari do, sian balik layar. Olo ma, gabe hatani dongan na di dok...gabe dang nyambung ma attong, gabe i do nian mambaen mekkel akka penonton on sipata. Mirip situtu ma tahe tu acara “OVJ” na adong di TV si noaeng...

Alai..nunga tung leleng hape tarbolusan partikkion i,, ai dang be poso be hape daging.  Ai tung do hape las situtu roha na uju i.molo nung juppang ari natal. Hape molo nuaeng olo nama sipata dang ni ingot..jala sipata dang ni pakkilalahon naung tarbolusi partikkion ari natal. Jadi denggan do hape ni ingot partikkion di hajegeson ni pamatang, asa gabe boi ni rimang rimangan akka nahurang lobi di ngolu on.

WN

TIKKI DAK DANAK Eps. PANOMU NOMUAN DI ARI PESTA

Molo nung juppang bulan bulan oktober...songon partikkion di saonari on, pittor taringot do iba di masa jegeson ni pardagingon. Ima masa dak-danak. Aha ma na gabe akka sipasunggul i ?. Ima bulan manang partikkion na naeng mandapothon Ari Natal.

Tung maria-ia si tutu do roha tikki i molo nung  naeng juppang ari pesta (natal). Attar godang do na ni persiaphon taringot tu pangeredeon niba na laho merayakan natal ;

1.        Ni tongosson ma baju natal tu Inong niba  molo nunga juppang ari rabu/ari onan ( Omak,,, tuhor baju ku laho pakke on marayat-ayat da...ningon ma), domu tusi attar burju ma iba di suru inong niba on attong. Ba..gabe dohot ma iba mamutik kopi asa, asa i tuhor baju natal on ( manang baju taon baru)

2.       Attar rajin ma iba maridi (gabe 2x saminggu, biasana attong  1x 2 minggu), dungi muse ni kikis ma sisilon, tarlumobi ma simanjojak na jotjot marsaridoddon, tor nu guddar ma attong pat on pakke guddar kasar, molo soi, ni orgosson ma tu batu molo tikki lao iba maridi tu mual.  Na olo do muse attong , gabe sering iba mamakke celana panjang asa songonna bottar bitis i, molo nunga juppang ari pesta.

3.       Molo sian gareja, di bagihon guru sikkola minggu ma attong ayat-ayat niba. Ni hafal ma attong  akka ayat-ayat  laho dokkonon di jolo akka ruas di tikki borgin ni ari pesta. Latihan ma attong setiap ari minggu di gareja mandokkon ayat-ayat on.

Dungi muse, adong do kebiasaan di tikki ari pesta tarlobi molo di partikkion na uju i. Ima molo ari natal akka dak-danak sahat tu na matua mambaen drama ma na domu tu ari pesta.

Tarlumobi drama ni akka dak-danak ( sikkola minggu) attar on do attong na paling bergengsi molo di hata nuaeng.  Jadi domu tusi, dimulani bulan oktober nunga marguru drama attong akka dak-danak.

4.       Mamasang gaba-gaba ma dohot lampion di jabu na be.  Dungi muse ni gisgis ma alaman ni jabu jala nu suanan ma akka bunga.

5.       Sai di laga-laga i oppung niba ma iba, alana habis bulu hona taba-an na laho mambahen Mariam. Ai tung tabo situtu attong na marbariam on...alani tabo na dang nipardulihon be, ai nunga habis bulu ni mata i surbu api ni bariam on dohot muse ma lubang ni igung marbirong alani ni timus ni bariam on.  Hape sahat di jabu, tong hona bura-bura sian omak niba, ai habis do attong miak tano hona baen tu bariam on. Alai...ai nang pe di bura-bura i..sai tong do ni jugul hon, ikkon marbariam iba na laho menyambut natal.

Tung maria-ia si tutu pangaredeon ni akka dak-danak uju i taringot tu ari pesta.  Molo di tikki saonari nunga marbeda be...

WN