 |
| Ilustrasi foto ni dak-danak di Samosir. DokPri |
Tung do maria-ia rohani si
Billem, lau marsikkola di manogot ni ari i. Mataniari pe tung uli, menorangi
huta Parkopian i. Tarida ma tutu, lindung ni Ibana lima meter lobi dompak Dolok
Pusik Buhit. Sai marjoketi ibana, di dalan na marhunik, martano abbula i. Diparmean-mean iban lindung na i.
Mamereng las ni roha si Billem,
gabe hera dohot do sude na Humaliang dalan na i maria-ia. Mangeol-eol akka
bunga-bunga, sappil-pil, jabbang, akka bulung ni hau dohot akka na asing dope,
lambok attong pangullus ni alogo i. Anduhur pe dohot martuttukkurru.
Esset-esset Gaol marulis-ulis.
Abbaroba dohot Siteok marlogu-logu. Gabe
ma hera na adong konser musik di dalan i.
Alai dang pola diattusi si Billem
akka naung masa disi. Naung dohot akka namarbulung, akka namaribbulu, nang
alogo mangihuthon las ni roha na i. Alana, anggo sa sittong na alani sipatu
Riker, na baru ni tuhor ni inong nai do mambahen. Ido anggo uju i dope, akka
sibahen las ni roha, tarlumobi di akka dakdanak.
Nung mulak sian sikkola. Pittor
hatop ma Si Billem mangganti bajuna. Sai diingot ibana, taringot parsiajaran
Bahasa Daerah nanituri-turihon ni guru na I si sikkola. Anggo akka persiajaran
na asing dang pola sai diingot ibana. Ai pola huroha songonna mamiltik tu
rohana akka ippola ni turi-turian i.
Dang pola piga-piga leleng. Nunga
tor sahat si Billem di jabuna. Pola do, songonna majjiar hodok na. Dang pola, sai sukkun-sukkun rohani inong na.
Nata pe nunga dibereng marikkat-ikat si Billem on.
“Alani las ni rohana, dibaen sipatu Riker i do ra i, asa songon na
sipanggaron i” nina rohani inong namamereng si Billem sai hojot-hojot mangganti
baju na dohot mangallang gadong.
“Nunga adong Gulamo ditutung omak?”
nina si Billem huhut diboan ibana sada piring marisi tolu potong gadong julur,
marmerah kulit na, mandapothon inong na I, di lambung ni losung batu.
“Nunga amang.,, bereng ma di
Poti-poti i” nina inong na on, sai huhut dipiari boras darat na I duda na I
sian nassogot.
Dang pola leleng. Nunga lipus si Billem, tu
hauma na di bahal ni huta nai. Inong na pe, dang be sai diparrohahon. “ Naung
lau do ra, marmeami tu jabuni Namboru na an” nina roha ni inong na on. Ai tusi
somal na gelleng nai marmeam dohot si Karmila.
Di balian I, dibutbut si Billem
ma piga-piga Andor ni gadong julur naung matoras. Dipotong-potong ibana, dohot
hudali tagelleng. Adong do ra pola saratus lobi, andor na I potong na i. Alani
semangat na ma attong. Ai naeng suanon ni ibana do hape andor i.
Tojop ni roha, na sai
manggor-gori, pittor di suan ibana ma andor I di bogas pangagasan ni among na. Hape,
Ai naeng suanon ni among disi Eme Darat. Dang pola dope attong diantusi ibana,
taringot akka pengulaan molo di balian. Molo adong, tano na ias, jala gobbur,
disi do somalna, akka namarbulung disuan. Ido dope anggo di rohana.
Sai tiris hodok ni si Billem,
alai sai tong dipuhuti ibana manuan andor na on. Diombakkon ibana hadali na on,
dungi dilukkup ibana andor I disi. Hape
nian, tung do las mata ni ari. Ai nunga jam sabolas lobi. Anggo among na, maradi
do dope di sopo-sopo ni halaki alani gasak ni ari. Among na on pe dang diboto
na ro si Billem tu juma i.
Ala sai gasak dope ari I,
dipahundul among na i muse, ditorushon maradi. “Lok majo holom sa otik na I”
nina rohana.
Dung Sae diinum among na I, tes
kopi na sian termos i. Hehe ma among na on, sian sopo-sopo na i. “tarhilala
tahe, tolu ngombak nai, paette mulak sian balian” nina rohana. Jong-jong among
na I. Dicabut piso na I gotting na I, dungi dirambashon pitu potong jabbang na
tubu di samping ni sopo-sopo i. Nunga
songon na ruhek-ruhek nian sopo-sopo I, jala adong ma disi tersurat, isurat
dohot Agong, “JEMPOL-nya Mana..?, LIKE dan SHARE dong.!!”.
Mardalan ma among si Billem tu
bogas na i. Dibereng ma, ai nunga sega be bogas na i. Disuan si Billem akka
gadong Julur, hape lau gabe paremean do i. Tor songonna marrimas do attong
among na i. Huhut muse huroha, songonna godang gula ni kopi na diinum na i. Songonna
marlojong, among na i mandapothon si Billem.
“Ai namarhua do ho Billem, gabe
gadong disuani ho, so paso hudali mi” nina among na I mangalagai. Ai nunga lobi
saratus andor na disuan na I, tinggal tolu na I nama.
Dungi dipaso ibana pangombakkan
na i. Dang dialusi ibana, hata ni among na i. Sip-sip do ibana. Ai ibana pe, tong do dang diboto ibana, boasa boi songonna
semangat hian ibana, meniru ippola ni turi-turian ni guru na i. Mardomu muse,
ai molo dikeluarga na sida, tung so jadi do sialus-alusan bora-bora ni
natua-tua. Holan makkurnut do ibana….
Anggo ate-ate ni among na I nunga
tung marsigor-gor, manida ula-ula ni si Billem. Alai, sai tong ma disukkun.
“Boasa suanon mu Andor I disi?,
lak loja do au dibaen ho bah” nina among na on, sambil dibuat hudali ni si
Billem i. Tabba makkurnut ma muse si
Billem on.
“Na begu dia do naeng na sorop tu
gelleng kon?, eheh Billem, Billem, holan goarmu do bagak binaen”
Sai songonna tarilu ma si Billem,
di parmuruk ni among na i. Alai gabe barani do ibana mandok, boasa disuan
ibanaa gadong julur i.
Mardalan ma si Billem, huhut
dipilos ibana salawarna na kendor I, mandapothon among na, na naeng mambutbut muse Andor i.
“Bapa., unang dibutbuti ho Andor
I”. nina si Billem.
“So ma ho..!!”
“Ido bapa., na hubege do adong
turi-turian ni guru nami”
“turi-turian aha I” nina among na
on muse.
“Diippola ni turian na I, Molo
manuan suan-suan na marboras tu gijjang, ikkon do di mula ni poltak bulan. Molo
ma nuan suan-suanan na marboras tu toru ikkon do dung sae Bulan Tula”
Mambege hata ni si Billem I,
pittor dobo do dipaso among na na naeng mambutbuti gadong i. Ai songonna
taringot among na i, di akka poda-poda ni natua-tua na parjolo i. “Hera na
adong do tutu, na jolo akka hata ni natua-tua si songoni” nina rohana.
Sai dibereng-bereng among na I na humaliang parjumaan i. Dungi sai ingot-ingot among na i, tolu ari na lewat
marmeami halak si Billem di tonga ni alaman, dohot akka dongan na si Karmila,
si Gelluk dohot si Sere. Tung attong torang borgin I, Poltak Bulan Tula. Toho
ma tutu, ikkon manuan na marboras tu toru nama. Andor, dang be Eme.
“Billem,, gadong I ma ta suan
dison bah.. Ido molo hu rimang-rimangi, gabe pargadongan do bagak pangagasan on”.
Dang pola dialusi si Billem hata
ni among na I, alai pittor dibuat ibana do muse hudali na itappalhon ni among
nai tu bona ni hau Dap-Dap.
“Tasuan ma muse Andor I Billem, piga nai nakkaning naso suan dope”
“Holan tolu na I nama bapa” nina
si Billem mangalusi
“Ima suatton ma I sude.. Ho ma
nuan, asa bagak anon boras na” nina
among na I, huhut dipohol-pohol tanggurung ni si Billem i.
Dung sae, disuan di si Billem
sude Andor i. Mulak ma na sida sian juma. Ai nunga jam dua bolas lewat. Nunga
parmale-male ni si ubeon.
Dung piga-piga leleng, martubbor
do tutu Andor na isuan ni Si Billem i. Bagak-bagak bulung na. hape so na pola
nian godang-godang di baen halaki orbuk na.
Ari jumat, di naung mulak sian
sikkola si Billem. Ditogihon among na ma ibana lau mengombak gadong na disuan
na I piga-piga bulan na lewat. Ai songonna penasaran, among na I, mamereng
parbue ni gadong i, ai bagak attong bulung na tikki i. Diboan halaki ma hirang,
lau inganan ni gadong I annon.
Diombak among na i ma gadong i,
dibereng ma, tung do tutu bagak-bagak parbue na, ramos jala muse bolon-bolon. Sai pahesek-hesekon ma among na i.
“Anggo ho memang Billem, sai
diramoti Opputa I do huroha ula-ulam dohot roham” nina among na on, sabbil muse
diombakkon hudali na i.
Holan senyum do si Billem,
mangalusi hatani among na i.
“Pamasuk ma tu hirang da Billem”
“Olo bapa,, tenang ma ho, siap
86”
Dungi mulak ma halaki, mamboan
godang julur i. Jala tor hatop di diloppahan inong ni si Billem. Ai songon na
terpesona do dohot inong na I mamereng parbue ni gadong julur i.
“Songon asing parbueni gadong on,
bagak-bagak parmerah-merah nai” nina inong na.
“Olo hatop ma ta loppa, au nunga
penasaran on” nina among nai mangalusi
Dohot ma among na mangurupi
loppa-loppa ni inong na i. Dituk-tuki ma akka sabe, dohot akka bawang, ditabba
muse ittir-ittir dungi dibean halaki ma tobbur-tobbur sian gulamo ikan
Sollar na hona tutung.
Gur-gur ma gadong, dungi masak
ma. Tobbur-tobbur pe nunga rade. Dungi mardaun pogu ma halaki.
“Toba na I puang ate na
manggadong I. Tobbur-tobbur na I do attong sada, mambaen gabe malliting”
Sekedar Refleksi : Adong do na
mamboto, manang to ho do hira-hira, tikki na jolo adong system panuanan ni
suan-suanan di halak batak songon Cerita ni si Billem on? Mauliate, WN
Tidak ada komentar:
Posting Komentar